पश्चिम मकवानपुरको मनहरी ४ स्थित सिमपानी देवकोट सामुदायिक वन उपभोक्ता समूहको क्षेत्रमा प्राकृतिक पार्क निर्माण गरिने भएको छ । हेटौँडा उपमहानगरपालिकामा रहेका सहिद स्मारक, पुष्पलाल स्मृति पार्क तथा चिल्ड्रेन पार्कजस्तै यहाँस्थित सार्वजनिक स्थलमा सुन्दर पार्क निर्माण गर्न लागिएको हो । पार्क निर्माण स्थलमा सोमबार माननीय सांसद तथा नेकपा एमालेका केन्द्रीय संसदीय विभाग सचिव अनन्त पौडेल र सांसद राजाराम स्याङ्तानले संयुक्त रुपमा बृक्षरोपण गरी उद्घाटन गरेका छन् । 

वन अतिक्रमण भएको क्षेत्रमा पार्क निर्माण गर्नका लागि जिल्ला वन कार्यालय मकवानपुरको स्वीकृतिमा ब्रह्मकुमारी राजयोग सेवा केन्द्र हेटौँडा, उपकेन्द्र मनहरी र सिमपानी देवकोट सामुदायिक वन उपभोक्ता समूहको साझेदारी भएको ब्रह्मकुमार बिजयराज सिग्देलले बताए । वन क्षेत्रमा बनाउन लागेको पार्कलाई प्राकृतिक रुप नै दिइने सिग्देलले बताए । ‘हामी प्रकृतिलाई चलाउने पक्षमा छैनौँ, प्रकृतिलाई श्रृंगार गर्ने काम मात्र गर्छाै ।’, उनले भने । 

बृक्षरोपण कार्यक्रममा बोल्दै सांसद पौडेलले प्रकृतिलाई सिंगारेर पर्यटकीय गन्तब्य बनाउनका लागि सुरु गरिएको पहलकदमीको स्वागद गर्दै आफूले सक्दो सहयोग गर्ने बताए । उनले राज्यको कोषलाई पार्क निर्माणका लागि लगानी गर्न पहल गरिने बताए । अर्का सांसद राजाराम स्याङ्तानले पनि पर्यटन वोर्डसहितका निकायहरुमा पार्क निर्माणका लागि पहल गर्ने आश्वासन दिलाए । 

कार्यक्रममा समाजसेवी एकराज उप्रेतीले मन्तब्य ब्यक्त गर्दै ५ हेक्टर क्षेत्रमा पोखरी निर्माण गरी डुंगा चलाउने, साना साना वाटिकाहरु बनाउने तथा पैदल यात्रीहरुका लागि पैदलमार्ग बनाउने योजना बनाएको बताए । शुशीला दिदीको सभाध्यक्षतामा भएको कार्यक्रममा ब्रह्मकुमारी राजयोग सेवा केन्द्रका दिदीहरु, एमाले जिल्ला अध्यक्ष मुनु सिग्देल, नेकपा माओवादी केन्द्रका नेता प्रकाश पौडेल, मकवानपुर उद्योग वाणिज्य संघका पूर्व उपाध्यक्ष प्रकाश ढकाल, हेटौँडा नगरपालिकाका बीके महर्जन, ध्रुव भुजेल, जिल्ला प्राविधिक कार्यालयका इन्जिनियर देवनारायण लामिछानेसहितका विभिन्न क्षेत्रका व्यक्तिहरुको सहभागिता रहेको थियो ।