ट्रेड युनियन मकवानपुरको अध्यक्षमा अर्याल
निजामती कर्मचारीहरुको आधिकारिक ट्रेड युनियन मकवानपुरको अध्यक्षमा विष्णु अर्याल चयन भएका छन् । गत जेठ १९ मा भएको पहिलो निर्वाचनमा एमाले निकट रहेको नेपाल निजामती कर्मचारी संगठनले जिल्लामा प्रथम स्थान हासिल गरेपछि संगठनले आधिकारिक ट्रेड युनियनको अध्यक्षमा संगठनका जिल्ला अध्यक्ष समेत रहेका अर्याललाई पठाएको हो । संगठनको बिहिबार बसेको बैठकले अर्याललाई अध्यक्षमा पठाउने निर्णय गरेसँगै अर्याल पहिलो आधिकारिक ट्रेड युनियनको अध्यक्षमा चयन भएका हुन् ।
संगठनले कोषाध्यक्षमा राजेन्द्र चौँलागाँई, सहसचिवमा केशब कौशिक तथा सदस्यहरुमा पार्वति पौडेल, ठाकुर पौडेल, मानकुमारी भट्टराई, तथा रामप्रसाद दाहाललाई चय गरेको छ । उता राष्ट्रिय कर्मचारी संगठनले सचिवमा वसन्तराज गौतम तथा एकजना सदस्यमा शान्ति खनाललाई पठाउने जनाएको छ । युनियनले भने हालसम्म कुनै निर्णय नगरेको जनाईएको छ । युनियनको तर्फबाट एक उपाध्यक्ष र एक सदस्य चयन हुनेछ् । यो वर्षबाट सुरु गरिएको आधिकारिक ट्रेड युनियनको निर्वाचनमा मकवानपुरमा ९ सय ८७ मत खसेको थियो । जसमध्ये नेपाल निजामती कर्मचारी संगठनले ४ सय ३० मत प्राप्त गरेको थियो ।