पत्रकारितासंगै सन्जु बनिन् गायिका

लामो समयदेखि यस क्षेत्रका स्टेज कार्यक्रम, पत्रपत्रिका, रेडियो कार्यक्रम तथा टेलिभिजन मार्फत व्यावसायिक पत्रकारिता र उद्घोषण गर्दै आएकी सञ्जु पौडेल नयाँ बर्षको प्रवेशसँगै साँगीतिक उपहार लिएर श्रोता तथा दर्शकमाझ आएकी छिन् । पौडेल बुटवलमा क्रियाशिल पत्रकार हुन् । 

जीवन र प्रेमका भोगाइलाई समेटेर गाइएको आधुनिक लयको लोक पप एल्बम ‘धेरैचोटी’ मा उनको एकल स्वर मात्र भने छैन गीतमा उनलाई सन्तोष र सनम पौडेलले साथ दिएका छन् । म्युजिक भिडियो समेत सँगै सार्वजनिक भएको गीतमा सन्तोष र सनमले मोडलिङ्ग गरेका छन् भने सञ्जुलाई पनि भिडियोमा देख्न सकिन्छ । गायन आफ्नो रुचीको बिषय भएको र घरमा सानै देखी भजनहरु गाउने गरेको बताउने सञ्जुले आफु दर्शक र श्रोताको मायामा बाँच्ने हुनाले गायनलाई अगाडी बढाउने जिम्मा पनि श्रोता तथा दर्शकमै जाने बताउछिन् ।

गायनमा लागेर पत्रकारितालाई पछाडी राख्ने सोंच भने उनको छैन । उनी भन्छिन् –‘उद्घोषण र पत्रकारितालाई छाड्ने कुरै आउँदैन जसले मलाई यहाँ सम्म ल्याएको छ ।’ नेपाल पत्रकार महासंघ रुपन्देही शाखाको कार्यकारी सदस्य समेत रहेकी सन्जुको स्वरलाई धेरैले तारिफ समेत गरेका छन् ।