पुनर्निर्माण प्राधिकरणले पूर्वस्वीकृतिबिना व्यक्तिगत घर निर्माण र रकम वितरण गर्न रोक लगाएको छ ।

प्राधिकरणले गत शुक्रबार एक सूचना प्रकाशित गरी स्वीकृतिबिना घर बनाउनु र रकम वितरण गर्नु गैरकानुनी हुने भन्दै रोक लगाएको हो । यो सूचनापछि गैरसरकारी संस्थाहरूले पनि घर र अन्य संरचना आफूखुसी निर्माण गर्न पाउने छैनन् ।

‘पुनर्निर्माण र पुनस्र्थापनाको काममा गैरसरकारी संस्थाहरूको सहयोग परिचालन गर्न छुट्टै कार्यविधि तयार गरिरहेको छ,’ सूचनामा भनिएको छ, ‘प्राधिकरणको स्वीकृतिबिना व्यक्तिगत घर निर्माण र रकम वितरण गर्नु कानुन विपरीत हुने भएकाले यस्तो कार्य रोकी प्राधिकरणमा सम्पर्क गर्नुहुन सम्बन्धित सबैमा आग्रह गरिन्छ ।’

प्राधिकरण प्रवक्ता सुरेश अधिकारीले भवन निर्माण गर्न कार्यमा समन्वय र एकरूपता कायम गर्न तथा भवनहरूको प्राविधिक पक्षलाई सुनिश्चित गर्न सूचित गरिएको बताए ।